കാർമേഘം

ഇപ്പോൾ നിനക്ക്‌ ചെന്നായ്യുടെ മുഖമാണ്
ഒരു മിന്നലിൽ നിന്റെ കണ്ണുകൾ തിളങ്ങി

ഏതോ നേർത്ത വരകളായ് നീ തീർത്ത മഴ
എന്റെ സ്വാതന്ത്ര്യത്തെ വരക്കുള്ളിനാക്കാനുള്ള നിന്റെ വിഫലമായ ശ്രമം

മഴ തീർത്ത എന്റെ നഗ്നത നിന്നെ ചിരിപ്പിച്ചേക്കാം

പക്ഷേ ഒരു കാറ്റിൽ നിന്റെ രൂപം മാറും
ഒരു പാഴ്മഴയായി നീ പെയ്തുതീരും
ഒരു മിന്നലായ് എങ്ങോ പോയ്മറയും
ഒരു ഇടിയായി പ്രതിധ്വനിച്ച് മരിക്കും

എന്നാൽ നീ അറിയുന്നുവോ
എന്റെ സ്വപ്നങ്ങൾക്ക് മരണമില്ല
നിന്റെ മഴക്കെന്നെ വരകളിൽ ഒതുക്കാനാവില്ല
നിന്റെ മിന്നലിനെ ഞാൻ പേടിക്കുന്നില്ല

ഏതോ സ്വപ്നവും പേറി ഞാൻ പോകുന്നു
ഓരോ കാറ്റിലും മാറുന്ന നിന്നോടും
നിന്റെ കള്ളക്കരച്ചിലായ ആ മഴയോടും
എനിക്ക് പറയാനൊന്നുമില്ല
ഈ ചിരിയും സ്വപ്നങ്ങളും നിന്റെ മഴ തുറന്നു കാട്ടിയ എന്റെ നഗ്നതയും സത്യങ്ങൾ!